Ulugʼ ustoz, hazrati odam, benazir inson, Xalqaro axborotlashtirish akademiyasi akademigi, Leybnits nomidagi Yevropa tabiiy fanlar akademiyasi akademigi, kimyo fanlari doktori, professor Xasan Turobovich Sharipov hayot boʼlganida bugun 76 yoshni qarshi olar edilar.
Ulugʼ kimyogar- muhandis, texnolog olim, 50 yillik ilmiy-pedagogik tajribaga ega mutaxassis, fizik-kimyo va kristallo kimyo, noorganik va koordinatsion birikmalar spektroskopiyasi, Nodir va kamyob elementlar, metallurgiya sohasida rudalarni qayta ishlash texnologiyasi yoʼnalishida ilmiy izlanishlar olib borgan Sharipov Xasan Turobovich 1947 yil 13 aprel kuni Toshkentda tavallud topgan.
Ulugʼ olim 1965-yilda maktabni tugatgach, Lomonosov nomidagi Moskva nozik kimyo texnologiyasi institutiga birinchi kursiga oʼqishga qabul qilingan va 1971 yilda muvaffaqiyatli, aʼlo darajada tugatgan.
1971-1974 yillarda esa mazkur M.V.Lomonosov nomidagi Moskva Nozik kimyo texnologiyasi institutining aspiranti boʼlgan.
1974-1976 yillarda Oʼzbekiston Respublikasi Fanlar akademiyasi Elektronika institutida kichik ilmiy xodim lavozimida ilmiy faoliyatini davom ettirgan.
1976-1994 yillar davomida Oʼzbekiston Respublikasi Fanlar akademiyasi Kimyo instituti kichik ilmiy xodimi, soʼngra esa katta ilmiy xodimi, hamda «Fizik-kimyoviy tadqiqotlari» laboratoriyasining mudiri lavazimida faoliyat yuritgan.
1994-1999 yillarda Maxsus qotishma Respublika tashkiloti ilmiy va loyihalash boʼyicha rahbar muovini sifatida faoliyat yuritgan.
1999-2000 yillarda Oʼzbekiston rangli metall loyiha instituti direktori sifatida ishlagan.
2000-2004 O’zbekiston Respublikasi maxsus qotishma tashkiloti rahbari sifatida faoliyat olib borgan.
2004-2006 yillarda Toshkent kimyo-texnologiya instituti «Kamyob, nodir, tarqoq metallar texnologiyasi va analitik kimyo» kafedrasi professori sifatida ishlab kelgan.
2006-2011 yillarda shu institutining «Аnalitik kimyo va nodir metallar texnologiyasi» kafedrasi mudiri lavozimida ishlagan.
2015-2021 yillarda I.Karimov nomidagi Toshkent davlat texnika universiteti qoshidagi DUK “Fan va taraqqiyot” ilmiy ishlar boʼyicha rais muovini vazifasini bajargan.
2021 yildan hayotining soʼnggi kunlariga qadar OʼzR FА Umumiy va noorganik kimyo instituti direktori lavozimida faoliyat olib borgan.
Sharipov Xasan Turobovich 750 dan ortiq ilmiy ishlar, jumladan, 10 ta monografiya va ikkita darslik, 22 ta mualliflik guvohnomasi, hamda bir nechta Oʼzbekiston Respublikasi patentlari muallifi hisoblanadi.
Kimyogar olimning ilmiy ishlari dunyoning yuqori reytingli jurnallarida, jumladan, Acta Crystallographica, Physical Revew, Phys; Solid State, Materials Science and Engineering. Application, J. of Thermal analysis, Ferroelectric, Journal of environmental science and halth,Journal of UCTM, Austrian Journal of Technical and Natural Sciences,SSSR Fanlar akademiyasining maʼruzalari, SSSR Fanlar akademiyasi materiallari, Optika va spektroskopiya, Аmaliy spektroskopiya jurnali, Kristallar spektroskopiyasi, Strukturaviy kimyo jurnali, Noorganik kimyo jurnali, Koordinatsion kimyo kabi nashrlarda chop etilar edi.
Sharipov Xasan Turobovichning rahbarligida va ishtirokida Respublika metallurgiya sanoati uchun yigirmadan ortiq fan nomzodi va 10 nafar fan doktori, koʼplab bakalavr va magistrlar tayyorlangan.
Ulugʼ ustoz Xasan Turobovich Sharipov “Oʼzbekiston kimyo” jurnali muharriri, “Oʼzbekiston konchilik xabarnomasi”, “Kimyo va kimyo texnologiyasi”, “Fan va innovatsion ishlanmalar”, “Kompozit materiallar” jurnallari va har yili nashr etiladigan “Yangi materiallar” jurnallari tahrir hayʼati aʼzosi sifatida faoliyat olib borgan. MDH mamlakatlari Xalqaro Fanlar akademiyasining “Yangi materiallar” ilmiy kengashi aʼzosi sifatida ishlab kelgan.
Sharipov MDH mamlakatlari va uzoq xorijdagi ilmiy va oliy oʼquv yurtlari va ilmiy tadqiqot muassasalri bilan oʼzaro ilmiy hamkorlikda xalqaro darajadagi loyihalarni gʼolibi sifatida tanilgan olim hisoblandi. Koʼpgina xalqaro darajadagi, hamda davlat mukofotlarni qoʼlga kiritgan, jumladan Mendeleyev nomidagi, Oʼzbekiston Respublikasi Fan va texnika davlat qoʼmitasining diplomi va mukofoti bilan hamda “Oʼzbekiston Respublikasi Mustaqilligining 10 va 30 yilligi” yubileyida esdalik nishoni bilan (2001, 2021 yillar), qator koʼkrak nishonlari, jumladan “Konchi” 3 darajali “Shon-sharaf” (2017), 2 darajali “Mehnat faxriysi” (2021), fan va ixtirochilik sohasidagi xizmatlari uchun Аlbert Nobel medal, “Ilmiy maktab asoschisi” faxriy unvoni ulugʼ olimning ilmiy ishlanmalari, ilmiy va ijodiy faoliyati samarasida qoʼlga kiritilgan va munosib taqdirlangan.
Xasan Turobovich koʼplab ilmiy va tashkiliy ishlarni amalga oshirgan olim hisoblanadi. Oʼzbekiston Respublikasi Fanlar akademiyasi Kimyo instituti qoshidagi fan doktori ilmiy darajasini berish boʼyicha qoʼshma ixtisoslashtirilgan kengash raisining oʼrinbosari, Mirzo Ulugʼbek nomidagi Oʼzbekiston Milliy universiteti huzuridagi Ilmiy kengashning noorganik, analitik, organik va fizik kimyo mutaxassisliklari boʼyicha fan doktori ilmiy darajasini berish boʼyicha ilmiy kengash aʼzosi va raisi sifatida ishlab kelgan.
2021 yilda Leybnits nomidagi Yevropa tabiiy fanlar akademiyasining akademigi etib saylangan.
Ustozning OʼzRFА Umumiy va noorganik kimyo institutiga qayta ishga kelgani davrida oʼzi bilan birga ilmiy muhit, ishchanlik kayfiyati, fayz va oʼzgacha shukuh bilan kirib kelgani mazkur institut xodimlarini ishchanlik qobiliyatini yanada oshirgani ayni haqiqat. Sababi ulugʼ yoshda va ayni dam olish kerak pallada ustoz ertadan kechgacha tinim olmasdan gʼayrat bilan ishlagani ilmiy xodimlar uchun oʼrnak vazifasini oʼtadi. Ulugʼ ustozdan oʼrganilishi lozim boʼlgan ilm, egallanishi shart boʼlgan bilimlar hali koʼp edi.
Ulugʼ kimyogar olim, xalqaro darajadagi akademik, kimyo fanlari doktori, professor, hazrati inson Hasan Turobovich Sharipov 2022 yil 14 noyabrda Toshkent shahrida vafot etgan.
Olim inson vafot etmaydi, shunchaki uning ikkinchi umri oʼzidan meros qolgan shogirdlarining ilmiy ishlanmalarida qayta tugʼiladi. Bizni tark etgan ustozdek benazir inson, kamtar va kamsuqum olim, uzoq yillar davomida Umumiy va noorganik kimyo instituti jamoasi unutmaydi, ustoz ruhi va yodi shogirdlar va ilmiy xodimlar qalbida abadiy mangu barhayot saqlanadi.
Muborak oyda qoʼllarimiz kaftini keng ochib Yaratgandan ustozimiz uchun jannatning eng go'zal va betakror goʼshasini duo ila soʼraymiz. Oxiratingiz obod bo'lsin ustoz!
Ustozning shogirdlari kimyo fanlari doktori, professor Azizov Tohir Azizovich, kimyo fanlari doktori, professor Kadrova Zuhra Chingizovna, kimyo fanlari doktori, professor Daminova Shaxlo Sharipovna, texnika fanlari doktori, professor Sharafutdinnov Ulug’bek Ziyatovich, texnika fanlari doktori, professor Kamolov Tursunboy Ochilovich nomidan O`zRFA Umumiy va noorganik kimyo instituti bosh ilmiy xodimi, t.f.d., prof. Jumaeva Dilnoza Jo`raevna hamda t.f.n., katta ilmiy xodim Pirimov To`ychi Jumaevich.
