Bugun, 29-iyun kuni Milliy matbuot markazida Fanlar akademiyasi Materialshunoslik instituti tomonidan Innovatsion rivojlanish vazirligi, “Oʼzkimyosanoat” АJ mutasaddidlari ishtirokida “Yashil texnologiyalar vodiysi” birinchi ilmiy-texnologik konsortsiumi: maqsad, vazifalar va istiqbollar” matbuot anjumani oʼtkazildi.
Unda “Yashil texnologiyalar vodiysi”ning maqsadi, vazifalari, undan kutilayotgan natijalar haqida maʼlumot berildi. Bu loyiha Oʼzbekiston Respublikasi Fanlar akademiyasi, Innovatsion rivojlanish vazirligi, “Oʼzkimyosanoat” АJ hamda Drezden texnika universiteti (Germaniya) hamkorligida amalga oshirilmoqda.
Konsortsiumning maqsadi vodorod energetikasi texnologiyalari, karbon (uglerod) tolasini ishlab chiqarish texnologiyasi, texnogen chiqindilardan qora va rangli metallar ajratib olish texnologiyalari, xususiyatlari oldindan belgilangan materiallar yaratish, yangi tur yengil va mustahkam materiallarni ishlab chiqish, sinash va tajriba-sanoat darajasida joriy etish boʼyicha mega-loyihalarni amalga oshirishdan iborat.
OʼzR FА Materialshunoslik institutining noyob ilmiy obyekti “Katta quyosh qurilmasi” bazasida, shu qatorda, chet ellik ilmiy markazlarni ham jalb qilgan holda bir qator innovatsion va amaliy izlanishlar amalga oshiriladi. Masalan, Qurilmada mujassamlashgan Quyosh nurlari yordamida qizitish hisobiga fotokatalitik usul bilan bevosita suvdan vodorod olish jarayonlari boʼyicha izlanishlar olib borilgan. Mujassamlashgan Quyosh nurlaridan foydalanish, yuqori qiymatga ega energiya sarfisiz, suvni parchalashga kerak boʼladigan yuqori haroratlarga (1500 оС dan yuqori) erishish imkonini beradi.
Vodorodni Quyosh nurlari yordamida ishlab chiqarish yorugʼlik yutuvchilar va katalizatorlarning turli xil birikmalaridan foydalanish tufayli ancha samarali jarayon boʼlishi mumkin, kimyoviy birikmaning samaradorligini ikki baravar oshirgan holda nurni yutib va suv molekulalarini parchalab vodorod yoqilgʼisini ishlab chiqarishni taʼminlaydi.
Hozirgi vaqtda, mujassamlashgan Quyosh nuri hisobiga vodorod ishlab chiqarish boʼyicha mega-loyihani amalga oshirish masalasi Darmshtadt universiteti (Germaniya), Kyushi universiteti (Yaponiya), Koreya sanoat texnologiyalari instituti (KITECH), RFА Silikatlar kimyosi institutlari (Rossiya) bilan muhokama qilinmoqda.
Matbuot anjumanida loyiha doirasida amalga oshirilishi rejalashtirilayotgan ilmiy izlanishlar to’g’risida batafsil ma’lumot berildi.
