Bugun, 28-iyun kuni Oʼzbekiston Respublikasi Fanlar akademiyasi tizimidagi ilmiy tashkilotlar xodimlari ishtirokida “Oʼzbekiston Respublikasining Konstitutsiyasiga oʼzgartish va qoʼshimchalar kiritish toʼgʼrisidagi” Oʼzbekiston Respublikasining konstitutsiyaviy qonun loyihasi yuzasidan jamoatchilik muhokamasi oʼtkazildi.
Kirish soʼzida Konstitutsiyaviy Qonun loyihasini tayyorlash doirasida milliy qonunchilik, qadriyatlar va huquqni qoʼllash amaliyoti, oʼzbek davlatchiligining tarixiy tajribasi, insonning asosiy huquq va erkinliklarini taʼminlash sohasidagi asosiy xalqaro standartlar hamda ilgʼor xorijiy tajriba – 100 dan ortiq mamlakat konstitutsiyalari, ulardan 20 tasi soʼnggi 5 yilda qabul qilingan tajribalar inobatga olingani hamda 2022-yilning 25-iyundan 5-iyulga qadar “Oʼzbekiston Respublikasining Konstitutsiyasiga oʼzgartish va qoʼshimchalar kiritish toʼgʼrisida”gi Oʼzbekiston Respublikasining Konstitutsiyaviy qonun loyihasining umumxalq muhokamasi boshlangani haqida maʼlumot berildi.
Shundan soʼng Oʼzbekiston Oliy Majlisining Qonunchilik palatasi spikerining birinchi oʼrinbosari, Konstitutsiyaviy islohotlar Komissiyasining raisi, akademik Аkmal Saidov jamoatchilik muhokamasi ishtirokchilariga mamlakatimizda bu borada amalga oshirilayotgan ishlar va umumxalq muhokamasi haqida batafsil toʼxtaldi.
Jumladan, Oʼzbekiston Oliy Majlisining Qonunchilik palatasi tarafidan “Oʼzbekiston Respublikasi Konstitutsiyasiga oʼzgartish va qoʼshimchalar kiritish toʼgʼrisida”gi qonun loyihasini eʼlon qilingani, loyihada asosiy qonunning 64 ta moddasiga 200 dan ortiq oʼzgartishlar kiritish hamda 16 ta normani oʼz ichiga olgan 6 ta yangi modda (prim-moddalar) qoʼshish taklif etilgani haqida fikr-mulohazalar bildirildi.
Shu oʼrinda, tadbirda Konstitutsiyada har kim davlat taʼlim tashkilotlarida tanlov asosida bepul oliy maʼlumot olishga haqli ekanligi, Oliy taʼlim va ilmiy-tadqiqot tashkilotlari qonunda belgilangan doirada oʼzini oʼzi boshqarish, akademik erkinlik, shuningdek tadqiqotlar oʼtkazish va oʼqitish erkinligi huquqiga ega ekanligi, davlat ilm-fanni rivojlantirishga, jahon ilmiy hamjamiyati bilan ilmiy aloqalar oʼrnatishga koʼmaklashishi hamda ilmiy va texnikaviy ijod erkinligidan tashqari, badiiy ijod erkinligi berilishi hamda madaniyat yutuqlaridan foydalanish huquqi kafolatlanishi kabi masalalarga ham alohida eʼtibor qaratildi.
Jamoatchilik muhokamasi yakunida Konstitutsiyaviy tuzatishlar, birinchi navbatda, jamiyatning turli ijtimoiy qatlamlariga mansub boʼlgan fuqarolarning muayyan shaxsiy, ijtimoiy, iqtisodiy, siyosiy, madaniy va ekologik huquqlari hamda manfaatlarini kafolatli tarzda taʼminlashga, himoya qilishga qaratilgan toʼgʼridan-toʼgʼri ishlaydigan normalarga aylanadi, deya xulosa qilindi.
