Bugun, 5-avgust kuni Аxborot va ommaviy kommunikatsiyalar agentligida joriy yil 6 oy davomida Fanlar akademiyasiga fuqarolardan kelib tushgan murojaatlar boʼyicha brifing oʼtkazildi.
Unda fuqarolardan kelib tushgan murojaatlar va ulardan kelgan baʼzi muhim savollarga javob berib oʼtildi.
Oʼzbekiston Respublikasi Fanlar akademiyasiga joriy yilning birinchi yarmida jismoniy va yuridik shaxslardan jami 174 ta murojaat kelib tushgan boʼlib shundan:
• 77 tasi Oʼzbekiston Respubliikasi Prezidenti virtual qabulxonasidan;
• 24 tasi ogʼzaki;
• 73 tasi yozma murojaatlarni tashkil etadi, ularni oʼrnatilgan tartibda koʼrib chiqilishi va ijro etilishi taʼminlangan.
1. Oʼzbekiston Respublikasi Fanlar akademiyasining ilmiy-tadqiqot institutlariga doktorantura va tayanch doktoranturada oʼqish uchun hujjatlarni qabul qilish qachon boshlanadi?
Oʼzbekiston Respublikasi Vazirlar Mahkamasining 2017-yil 22-maydagi “Oliy taʼlimdan keyingi taʼlim tizimini yanada takomillashtirish chora-tadbirlari toʼgʼrisida”gi 304-sonli qarori balan tasdiqlangan “Oliy taʼlimdan keyingi taʼlim toʼgʼrisidagi nizom”ning 15-bandiga muvofiq:
Ilmiy tashkilot va taʼlim muassasalar har yili 1-sentyabrdan kechikmasdan ommaviy axborot vositalarida qabul kvotalariga muvofiq hujjatlarni qabul qilish muddatlarini, talab qilinadigan hujjatlar, topshiriladigan imtihonlar roʼyxatini va qabul kvotasi miqdorini koʼrsatgan holda tayanch doktorantura va doktoranturada oʼqish uchun talabgorlarning hujjatlarini qabul qilish toʼgʼrisida eʼlon beradi.
Hujjatlar ilmiy tashkilot va taʼlim muassasalari qabul komissiyasi tomonidan 15-sentyabrdan 15-oktyabrgacha boʼlgan davrda yagona elektron tizim orqali qabul qilinadi.
2. Tayanch doktorantura oʼqishga kirish istagida boʼlgan nomzodlarga talablar qanday qanday?
“Oliy taʼlimdan keyingi taʼlim toʼgʼrisidagi nizom”ning 16-bandiga muvofiq:
Tayanch doktoranturaga quyidagilarga ega boʼlganlar qabul qilinadi:
Magistr darajasiga yoxud klinik ordinaturani tugatgan (tibbiyot fanlari uchun), oliy maʼlumot toʼgʼrisidagi diplom (mutaxassislik dasturlari boʼyicha) ega boʼlganlar;
Falsafa doktori (Rhd) ilmiy darajasini olish uchun dissertatsiya tadqiqoti asosini tashkil qilishi mumkin boʼlgan ilmiy natijalar, shu jumladan ilmiy jurnallarda chop etilgan kamida bitta maqola hamda tegishli yoʼnalishlar boʼyicha ikkitadan kam boʼlmagan ilmiy ishlar toʼplamlariga kiritilgan maʼruza tezislariga ega boʼlganlar.
Tayanch doktoranturada oʼqishga talabgorlar ilmiy tashkilot yoki taʼlim muassasalariga quyidagi hujjatlarni taqdim etadilar:
Аriza;
Qisqacha biografik maʼlumotnoma;
Mehnat daftarchasining belgilangan tartibda tasdiqlangan nusxasi (ishlayotgan talabgorlar uchun);
Oliy taʼlim muassasasi magistraturasi diplomi yoki klinik ordinaturani tugatganlik (tibbiyot fanlari uchun), oliy maʼlumot (mutaxassislik dasturlari boʼyicha) toʼgʼrisidagi diplom nusxasi;
Nashr etilgan ilmiy ishlar roʼyxati, shuningdek ularning nusxalari.
Shu oʼrinda doktoranturada oʼqishga talabgorlardan quyidagilarga ega boʼlganlar qabul qilinadi:
Fan nomzodi yoki falsafa doktori (Phd) yoxud ularga tenglashtirilgan xorijiy davlatlarda olingan ilmiy darajalar;
Fan nomzodi yoki falsafa doktori (Phd) ilmiy darajasi yoxud ularga tenglashtirilgan boshqa ilmiy darajalar olgandan soʼng muhim ilmiy yutuqlarga erishish, shu jumladan, fan doktori (Dsc) ilmiy darajasini olish uchun dissertatsiya tadqiqoti asosini tashkil qilishi mumkin boʼlgan ilmiy jurnallarda chop etilgan kamida uchta ilmiy maqolaga hamda ilmiy-amaliy konferentsiyalar, seminarlar va tegishli ilmiy yoʼnalishlar boʼyicha ilmiy ishlar toʼplamlarida kamida ikkita tezisga ega boʼlish.
doktoranturada oʼqishga talabgorlar ilmiy tashkilot yoki taʼlim muassasalariga quyidagi hujjatlarni taqdim etadilar:
Аriza;
Qisqacha biografik maʼlumotnoma;
Mehnat daftarchasining belgilangan tartibda tasdiqlangan nusxasi (ishlayotgan talabgorlar uchun);
Oliy maʼlumot, fan nomzodi yoxud falsafa doktori (Phd) yoki xorijiy davlatlarda unga tenglashtirilgan ilmiy darajaga ega boʼlganligi toʼgʼrisidagi diplom nusxasi;
Tadqiqot mavzusi boʼyicha ilmiy maʼruza va fan doktori (Dsc) ilmiy darajasini olish uchun tayyorlangan doktorlik dissertatsiyasi rejasining mufassal loyihasi;
Nashr etilgan ilmiy ishlar roʼyxati, shuningdek ularning nusxalari.
3. Falsafa doktori (Phd) yoki fan doktori (Dsc) ilmiy darajasini olish uchun tayyorlangan doktorlik dissertatsiyasini oʼqish muddati tamom boʼlishidan oldin himoya qilganlarga qanday ragʼbatlantirish mavjud?
Oʼzbekiston Respublikasi Vazirlar Mahkamasining 2020-yil 6-noyabrdagi “Ilmiy darajali kadrlarni tayyorlash jarayonlarining shaffofligini taʼminlash va samaradorligini oshirish chora-tadbirlari toʼgʼrisida”gi 696-sonli qarorining 16-bandiga muvofiq falsafa doktori (Phd) yoki fan doktori (Dsc) ilmiy darajasini olish uchun tayyorlangan doktorlik dissertatsiyasini oʼqish muddati tamom boʼlishidan oldin himoya qilganlarga, shuningdek, ularning ilmiy rahbarlari va konsultantlariga muassasa rahbarining buyrugʼi bilan oʼqish muddatining qolgan davri (muddati) uchun nazarda tutilgan tegishlicha stipendiyaning hamda doktorant bilan olib borilgan ish uchun toʼlovning jami miqdori hajmida tegishli diplom taqdim etilgan kundan boshlab koʼpi bilan 20 kun muddatda mukofot toʼlanadi.
Bunda, mazkur bandda nazarda tutilgan xarajatlarni moliyalashtirish Oʼzbekiston Respublikasining Respublika byudjetidan birinchi darajali byudjet mablagʼlarini taqsimlovchi sifatida tegishli vazirlik va idoralarga ajratiladigan mablagʼlar hisobidan, zarurat boʼlganda asoslangan hisob-kitoblarga muvofiq Oʼzbekiston Respublikasi davlat byudjeti parametrlari doirasida amalga oshiriladi.
