Oʼzbekiston Respublikasi Fanlar akademiyasi Zoologiya instituti “Kamyob hayvonlar hisobi va kadastri” laboratoriyasi xodimlari Fargʼona viloyatida rejalashtirilgan kadastr tadqiqotlarini oʼtkazdilar.
Ekspeditsiyaning asosiy maqsadi - Ciconia ciconia asiatica – Oʼrta Osiyo kenja turi oʼzining Yevropa kenja turidan kattaroq oʼlchami bilan ajralib turadigan Turkiston oq laylagining - Fargʼona vodiysida uyalash hisobini olib borish.
Аyni bahor kunlari oq laylaklarda koʼpayish mavsumi boshlangan. Qushlar koʼplab yillar mobaynida oʼzlari foydalangan mavjud uyalarini taʼmirlashmoqda va yangilarini qurishmoqda.
Laylaklar - odamlar bilan noyob hayvonlarning nisbatan muvaffaqiyatli birga yashashining juda kam uchraydigan namunasidir: ular uyalarini faqat yovvoyi tabiatda emas, balki antropogen landshaftlarda - elektr uzatish tarmoqlarida, suv minoralarida ham qurishni afzal koʼrishadi, hamda ular sayoz suvlarda, Fargʼona viloyatidagi katta hajmdagi inson tomonidan bunyod etilgan; sholi dalalarida, baliqchilik suv havzalarida, sugʼorish kanallarida ozuqa izlab topishadi.
Dastlabki maʼlumotlarga koʼra, soʼnggi 5 yil mobaynida Fargʼona vodiysida ushbu qushlarning soni koʼpayib bormoqda.
Shuningdek, Yozyovon qumli massivi hududida ikki galada oziqlanadigan 1000 dan ortiq qushlarni sanoqdan oʼtkazildi. “Fargʼona ovchilik va baliqchilik jamiyati” qoʼriqchilarining maʼlumotlariga koʼra, qushlar bu hududda har yili sentyabrdan may oyining oʼrtalariga qadar kuzatilib, ularning soni 1500 dan 2000 gachani tashkil etadi. 2020-yil sentyabr oyi boshida Fargʼona viloyatining Beshariq tumani Sariqamish koʼli atrofida 400 ga yaqin qushlarning mavsumiy galasini qayd etilgan. Ushbu qisqa ekspeditsiya davomida mintaqada 200 dan ortiq oq laylak uyalari ham topildi. Shuni taʼkidlash kerakki, ushbu noyob tipdagi turning dunyodagi populyatsiyasining katta qismi Oʼzbekistonda uyalaydi va ularning 95 foizi Fargʼona vodiysi hududiga toʼgʼri keladi.
Oq laylak 51 turdagi boshqa qushlar bilan bir qatorda (mamlakatimizda qushlarning 450 dan ortiq turlari mavjud) Oʼzbekiston Respublikasining Qizil kitobiga kiritilgan.
