Аsrlardan sado berib bizgacha yetib kelgan, oʼzligimiz, qiyofamiz, milliy qadriyatimizni oʼzida aks ettiruvchi xalq ogʼzaki ijodi namunalari insonni maʼnaviy yetuklikka, olamni tafakkur koʼzi bilan koʼrishga undovchi muhim vositadir.
Maʼlumki, xalq ogʼzaki ijodining turfa janrlari – alla, ertak, topishmoq, doston, maqol va naqllarimiz kuchli tarbiyaviy ahamiyatga ega. Shu bilan birga erkin fikrlashga, goʼzal xulqni shakllantirishga va nutq ravonligini oshirishga xizmat qiladi.
Oʼzbekiston Respublikasi Fanlar akademiyasi Oʼzbek tili, adabiyoti va folklori instituti “Folklor” boʼlimi tomonidan “Oʼzbek xalq ijodi yodgorliklari” nomli 100 jildlik majmuaning navbatdagi 16-17-18-jildlari nashrdan chiqdi. Hozirgi kunda 19-20 jildlari nashrdan chiqish arafasida.
Ushbu nashrning 59 jildi dostonlar, 10 jildi xalq qoʼshiqlari, 12 jildi ertaklar, qolgan jildlar esa terma, afsona, rivoyat, marsiya, naql, maqol, topishmoq, askiya, lof, latifa, ogʼzaki drama, bolalar folklori va boshqa janrlarni oʼz ichiga oladi.
Ushbu muhtasham jamlanmaga oʼzbek folkloriga oid rang-barang janrlardan iborat eng sara namunalar kiritiladi. Аsrlarni dogʼda qoldirgan boy madaniy merosimizning yozma shaklini kelajak avlodga yetkazish maʼsuliyati ostida bugungi kunda OʼzR FА Oʼzbek tili, adabiyoti va folklori instituti “Folklor” boʼlimi ilmiy xodimlari izchil ish olib bormoqda.
Umid qilamizki, koʼplab ustoz olimlarning mehnati singayotgan, oʼzbek folьklorshunosligi tarixida ilk bor nashrga tayyorlanayotgan ushbu 100 jildlik nashr keng kitobxonlar ommasiga manzur boʼladi. Va yana ming asrlar davomida kelajak avlod tarixiy qadriyatlarimiz, oʼlmas maʼnaviyatimiz haqida toʼla tasavvur va bilimga ega boʼlishiga muhim manba boʼlib xizmat qiladi.
