Bugungi kunda mamlakatimizda aholi xavfsizligini taʼminlash, tabiiy, texnogen hamda ekologik xususiyatli favqulodda vaziyatlardan muhofaza qilish davlat siyosatining ustuvor yoʼnalishlaridan biridir. Oʼzbekiston Respublikasi Prezidenti Shavkat Mirziyoyev 2020-yil 5-may kuni oʼtkazilgan videoselektor yigʼilishida Sardoba suv omborida yuz bergan favqulotda holat Sardoba, Oqoltin va Mirzaobod tumanlarida qishloq xoʼjaligiga ham jiddiy talofat yetkazganini taʼkidlab oʼtdi. Shuningdek, Buxoro viloyatida sodir bo’lgan tabiiy ofat ham qishloq xo’jaligi ekinlariga o`z ta’sirini ko’rsatdi. Bu kabi tabiiy ofatlar natijasida tuproq unumdorligi muammosi yanada dolzarb masalaga aylandi.
Hozirgi vaqtda dunyo aholisining oʼsish surati oziq-ovqat ishlab chiqarish suratiga nisbatan ortishi va qishloq xoʼjaligi mahsulotlari uchun zarur boʼlgan energiya manbalari, chuchuk suv zahiralari, ekinga yaroqli yerlar kabi resurlarning keskin qisqarishi jahon miqyosida oziq-ovqat muammosini keskin kuchaytirgan bir holatda tuproq unumdorligini oshirish qishloq xoʼjaligining asosiy muammolaridan biri sifatida yangi ilmiy-tadqiqotlar olib borilishini talab etmoqda.
Shu boisdan olimlarimiz bu yoʼnalishlarda ilmiy izlanishlarni olib bormoqdalar. Xususan, Umumiy va noorganik kimyo instituti tomonidan “Tuproq unumdorligini oshiruvchi yangi turdagi mikroelementlar tutgan guminli oʼgʼitlar olish texnologiyasini ishlab chiqish” hamda “Mahalliy xom-ashyolar asosida organik va murakkab oʼgʼitlar olishning jadallashgan texnologiyasini ishlab chiqish va ularni Sirdaryo viloyatidagi Sardoba suv ombori toshqinidan zarar koʼrgan hududlar tuproq unumdorligini qayta tiklashda qoʼllash”, Genetika va oʼsimliklar eksperimental biologiyasi instituti tomonidan “Tabiiy ofatdan zararlangan ekin maydonlariga takroriy ekin sifatida ertapishar, qurgʼoqchilikka chidamli, tola chiqimi yuqori yangi “Аfsona” gʼoʼza navini joriy etish” va “Ozuqabopligi va texnologik hosildorligi yuqori va tuproqning fitomeliorativ holatiga taʼsir qiluvchi joʼxorining yangi navlarini Buxoro viloyati tuproqlariga joriy etish”, Mikrobiologiya instituti olimlari tomonidan esa “Sirdaryo viloyatining suv toshqinidan zarar koʼrgan tuproqlarning unumdorligini qayta tiklashda yangi tarkibli mikrobial preparatlar konsortsiumini tayyorlash texnologiyasini ishlab chiqarish” mavzularida bugungi kunning dolzarb muammolari yechimiga qaratilgan ilmiy loyihalar ishlab chiqildi va Innovatsion rivojlanish vazirligi tomonidan eʼlon qilingan tanlovda ishtirok etish uchun taqdim qilindi.
Ushbu ilmiy loyihalar asosida respublikamizdagi mavjud imkoniyatlardan foydalangan holda Sirdaryo viloyatida suv toshqini taʼsirida zarar koʼrgan tuproqlar unumdorligini tiklash, qishloq xoʼjaligi ekinlaridan yuqori va sifatli hosil olish imkonini beruvchi innovatsion texnologiyalar ishlab chiqiladi va suv toshqini taʼsirida zarar koʼrgan dala maydonlarida qoʼllaniladi.
