OʼzR FА Umumiy va noorganik kimyo instituti olimlari tomonidan oʼzbek tilida “Texnik suvlarni tozalash va yumshatish jarayonlarini takomillashtirish” nomli yangi monografiya chop etildi.
Ushbu monografiyada respublikamizdagi neftni qayta ishlash korxonalarida neft xom-ashyolarini sovitish uchun ishlatiladigan oqava suvlarni tozalash va yumshatish boʼyicha olib borilgan tadqiqot natijalari keltirilgan. Sanoat oqova suvlarining fizik-kimyoviy xususiyatlari, ularning tarkibidagi qattiq zarrachalarning dispersligi va yopishqoqligi hamda ularning gravitatsiya maydonida choʼkish tezliklari aniqlangan, jarayon samaradorligining bosimga, gidravlik qarshilikga, reagent nisbatlariga korrelyatsion bogʼliqligi ochib berilgan, mayda dispersli va yirik qattiq zarrachalarni ajratishning yuqori darajadagi kompleks usuli ishlab chiqilgan va turli oʼlchamdagi qattiq zarachalarni choʼkish tezliklari aniqlangan, texnik aylanma suvlarni yumshatish, mayda va yirik dispers zarrachalardan tozalash jarayonining maqbul rejim-konstruktiv koʼrsatgichlari aniqlangan.
Monografiyadan muhandis-texnik xodimlar, ilmiy-tadqiqot muassasalari, neftni qayta ishlash korxonalari, neftkimyoviy, kimyoviy va ishlab chiqarishning turdosh sohalarida, bundan tashqari oliy taʼlim muassasalarining talabalari va oʼqituvchilari foydalanishlari mumkin.
