Oʻzbekiston Respublikasi Fanlar akademiyasi Temuriylar tarixi davlat muzeyi milliy uslubda bunyod boʻlgan muhtasham bino hisoblanadi. Ushbu maskan ziyoratgoh boʻlishi bilan birga, ilmiy tadqiqot muassasasi hamdir. Binobarin, Temuriylar davri tarixini izchil oʻrganayotgan tarixchi olimlar, ayniqsa yosh sharqshunos olimlar tomonidan olib borilayotgan tadqiqotlar butun dunyo temurshunoslari tomonidan eʼtirof etilmoqda.
18-oktabr – Temuriylar tarixi davlat muzeyi tashkil topgan kun. Ushbu sana munosabati bilan Oʻzbekiston Respublikasi Fanlar akademiyasi Temuriylar tarixi davlat muzeyi, OʻzR FA Xalqaro Amir Temur xayriya jamoat fondi,Xalqaro Amir Temur xayriya jamoat fondi Toshkent viloyati filiali bilan hamkorlikda muzeyning 22 yilligiga bagʻishlangan “Milliy oʻzlik va gʻurur koshonasi” mavzuida davrasuhbatioʻtkazildi. Tadbirni OʻzR FA Temuriylar tarixi davlat muzeyi direktori va Xalqaro Amir Temur xayriya jamoat fondi raisi, Xurshid Fayziyev tabrik soʻzi bilan ochib berdi. Soʻng Xalqaro Amir Temur xayriya jamoat fondi Toshkent viloyati muassasasi raisi Muhabbat Shoyusupova muzeyning mamlakatimiz ijtimoiy-siyosiy hayotida tutgan oʻrni haqida soʻzladi.
Muzey maʼmuriyati ushbu davra suhbati bilan “Ustoz-shogird” anʼanalarini rivojlantirish yoʻlida muzeyda tasviriy sanʼat asarlarini bunyod etgan ustalarni yosh avlod bilan tanishtirishni maqsad qilgan. Shu munosabat bilan Kamoliddin Behzod nomidagi Milliy rassomlik va dizayn instituti hamda Respublika rassomlik kolleji fidoyi ustozlari - Toyirjon Boltaboyev, Abdulaziz Akbarxoʻjayev, Fathiddin Shobarotov, shuningdek, oʻquvchi-talabalari taklif etildi.
Muzey qurilishidagi ijodiy jarayonlar haqida xattot, rassom, naqqosh, ganchkor va yogʻoch oʻymakor ustalarning dil soʻzlari tinglandi.
Oʻquvchi va talabalar taassurotlari haqida oʻz fikr-mulohazalarini bildirishdi. Shuningdek, tadbir ishtirokchilari tomonidan muzey boʻylab ekskursiyalar tashkil etilib, esdalik uchun fotosessiyalar oʻtkazildi.
