Oʼzbekiston Respublikasi Fanlar akademiyasi Genetika va oʼsimliklar eksperimental biologiyasi instituti olimlari tomonidan yaratilgan soyaning “Genetik-1” navi tezpishar boʼlib, takroriy ekinga mos nav hisoblanadi. Soyaning mazkur navi determinant tipda oʼsuvchi erta tezpishar boʼlib, oqsil miqdori 50 %, yogʼ miqdori 21-22 %, ayrim navlarga nisbatan navning nishon belgisi pishishi oldidan barglari sargʼayib toʼkiladi. Hosildorligi – 20-25 s/ga.
Soyaning “Genetik-1” navi Davlat reestriga kiritilgan va patentlangan. 2021-yilda Surxondaryo viloyati Jarqoʼrgʼon tumanida bugʼdoydan keyin takroriy ekin sifatida ekilib 27 s/ga hosil olindi.
Hozirgi kunda Toshkent viloyati hududida “Genetik-1” soya navining urugʼchiligini tashkil etish va ekin maydonini kengaytirish boʼyicha Innovatsion rivojlanish vazirligi bilan hamkorlikda tegishli ishlar olib borilmoqda.
