Joriy yil 9-aprel kuni O’zbekiston Respublikasi Prezidentining “Oʼzbekiston Respublikasida qayta tiklanuvchi va vodorod energetikasini rivojlantirish chora-tadbirlari toʼgʼrisida”gi qarori qabul qilindi.
Unga ko’ra:
- Fanlar akademiyasi “Xalqaro quyosh energiyasi instituti” MChJ negizida Energetika vazirligi huzurida Qayta tiklanuvchi energiya manbalari milliy ilmiy-tadqiqot instituti;
- Institut tuzilmasida Vodorod energetikasi ilmiy-tadqiqot markazi hamda Qayta tiklanuvchi va vodorod energetikasi texnologiyalarini sinash va sertifikatlash laboratoriyasi tashkil etiladi.
Institut davlat muassasasi shaklidagi yuridik shaxs hisoblanadi.
2021-yilda Institut faoliyatini tashkil etish uchun 50 mlrd soʼmgacha mablagʼ ajratiladi.
Institutning ilmiy va ilmiy-texnik xodimlari rivojlangan xorijiy davlatlardagi yetakchi ilmiy markazlarda ilmiy stajirovkadan oʼtadi.
2024/2025 oʼquv yilidan Islom Karimov nomidagi Toshkent davlat texnika universitetida “Vodorod energetikasi va texnologiyalari” magistratura mutaxassisligi boʼyicha kadrlar tayyorlash yoʼlga qoʼyiladi.
Shuningdek, qarorga koʼra, mamlakatda vodorod energetikasining rivojlanishi holati boʼyicha yillik hisobot tayyorlash va “InnoWeek.uz” innovatsion gʼoyalar haftaligi doirasida uning taqdimotini oʼtkazish amaliyoti joriy etiladi.
Institutning moddiy-texnik bazasini shakllantirish va mustahkamlash uchun zarur boʼlgan olib kirilayotgan uskunalar, texnologik qurilmalar va jihozlar, moddiy-texnika vositalari, dasturiy taʼminot va xizmatlar bojxona bojlaridan ozod qilinadi.
Mazkur qarorning qabul qilinishi mamlakatimizda vodorod energetikasini rivojlantirishdagi muhim qadamlardan biri boʼldi.
