Ayni kunlarda Fanlar akademiyasi Ion plazma va lazer texnologiyalari institutida bajarilayotgan Oʼzbekiston -Xitoy qoʼshma loyihasi doirasida loyiha rahbari V.Quvondiqov hamda kichik ilmiy xodim D.Oʼrazkulovalar Nanjing Tech Universiteti qoshidagi School of Flexible Electronics (Future Technologies) ilmiy maktabida hamkorlikda qoʼshma tadqiqotlar olib borishmoqda.
Xizmat safari davomida loyihada qoʼyilgan ilmiy vazifalar yuzasidan Xitoy tomonidagi hamkor ilmiy markazlar Nanjing Tech, Changzhou va Nanjing Forestry universitetlari olimlari (Sunsun Li, Wenchao Zhao, Chao Ma, Lingling Zhu, Yuming Wang, Zhen Wang) bilan hamkorlikda tadqiqotlar olib borilmoqda.
Olib borilayotgan tadqiqotlarda oʼz oʼzidan agregatsiyalanuvchi funksional monoqatlam materialini yarimshaffof organik quyosh elementlarida qoʼllash orqali ularning termik barqarorligini oshirish boʼyicha tajribalar oʼtkazilmoqda. Ushbu loyihada aqlli issiqxonalarda qoʼllash uchun yangi sintez qilingan materiallar asosida termik stressga chidamli yarimshaffof organik fotovoltaik elementlarning laborator namunalarini ishlab chiqish maqsad qilingan boʼlib, bu kabi yarim shaffof organik fotovolьtaik elementlarning optik yorugʼlik oʼtkazuvchanligining oʼsimliklarda kechayotgan fotosintez jarayonlariga taʼsir qilish mexanizmlarini tadqiq qilish rejalashtirilgan.
