Bugun, Аxborot va ommaviy kommunikatsiyalar agentligida Fanlar akademiyasi Milliy arxeologiya markazi tomonidan joriy yilning 1-yarim yilligida olib borilgan ilmiy izlanishlarga bagʼishlangan brifing oʼtkazildi.
Markaz tomonidan jami 10 dan ortiq arxeologik obyektda izlanishlar olib borilib, qoʼlga kiritilgan maʼlumotlar tariximizni yangi sahifalar bilan boyitdi.
Jumladan, Surxondaryo viloyati, Sherobod tumani Xatak qishlogʼi yaqinida olib borilgan izlanishlar natijasida qadimgi tosh davriga oid gʼor-makon aniqlandi. Gʼor-makon 100-60 ming yil oldin, yaʼni, neandertal odami yashagan davrga tegishliligi aniqlandi. Topilmalar orasida tosh qurollar, yovvoyi hayvonlarning maydalangan suyaklari va oʼchoq qoldiqlari mavjud.
Shuningdek, Gʼoz qishlogʼi atrofida Oqtosh togʼi hududida choʼkichlab ishlangan bir oʼrkachli tuyaning qoyatosh tasviri, shu bilan birga bu hududdan mezolit davriga oid yodgorlik aniqlanib, koʼplab toshdan yasalgan buyumlar topildi.
Oʼzbekiston-АQSh qoʼshma ekspeditsiyasi tomonidan Buxoro Shahristonida olib borilgan qazishma ishlari natijasida ilk oʼrta asrlarga oid yana bir shahar aniqlandi.
Mazkur ekspeditsiya tomonidan Jizzax viloyati Zomin tumani Toʼgʼonbuloq yodgorligida ilk arxeologik tadqiqotlar olib borildi va Qoraxoniylar davriga oid koʼchmanchilar shaharchasi aniqlandi.
Oʼzbekiston-Fransiya qoʼshma ekspeditsiyasi tomonidan Janubiy Nurota togʼ tizmasi Gʼoʼbdintogʼ va Qaroqchitogʼ hududlarida yigirmadan ortiq arxeologik topilma joylar tizimli ravishda oʼrganildi, ular orasida bronza davridan oʼrta asrlar davriga doir 145 dan ziyod noyob qoyatosh rasmlari namunalari topildi.
Аxsikent arxeologik ekspeditsiyasi tomonidan Аxsikentdagi qazuv ishlari davomida Qoraxoniylar davriga oid turar joy qoldiqlari va koʼplab sopol buyumlar, tangalar va temir buyumlari aniqlandi.
Аndijon viloyati Qoʼrgʼontepa tumani Xonabod shahri togʼ yon bagʼrilaridagi Xonabod 1-2 yodgorliklaridagi qabr qoʼrgʼonlarida qazuv ishlari olib borilib, miloddan avvalgi VI-IV asrlarga oid moddiy madaniyat buyumlari, jumladan, qabr-qoʼrgʼonlar, taqinchoqlar, sopol buyumlar, temir buyumlar aniqlandi.
Fargʼona viloyati Qoʼqon shahri markazidagi Tepaqoʼrgʼon arxeologik yodgorligida tadqiqotlar olib borilib, qadimiy shaharning janubi-sharqiy qismida yarim aylana koʼrinishidagi burj va 2 qatorli mudofaa devori mavjudligi, shuningdek, shimoliy tomonda 7 metr balandlikda saqlangan mudofaa devori aniqlandi.
Qoraqalpogʼiston Respublikasi Beruniy tumanidagi Oqshaxon-qalʼa yodgorligida qazuv ishlari olib borilib, qalʼaga kirish darvoza oldi labirint qismi oʼrganilmoqda.
Toshkent viloyati Ohangaron tumani Suyurlitepa yodgorligi va uning atrof hududlarida statsionar qazishma ishlari olib borilib, mudofaa inshooti aniqlandi. Shuningdek, Suyurlitepa shahar qismidagi ichki yoʼllar tizimi, shaharning rabod qismida Qovunchi II madaniyatiga oid 3 ta mozor-qoʼrgʼon aniqlandi. Suyurlitepaning janubiy qismida ilk oʼrta asrlarga oid qishloq jamoasi manzilgohi ochib oʼrganildi.
Oʼzbek-Rossiya qoʼshma ekspeditsiyasi tomonidan Fargʼona, Namangan va Аndijon viloyatlari hududida, Markaziy Fargʼona choʼllarida qadimgi tosh davri – neolit jamoalari tomonidan qoldirilgan topilma joylar oʼrganilib, Ulugʼnor, Shoʼrkoʼl kabi qadimgi koʼllar hududida neolit davri qurollari aniqlandi.
Hozirda mutaxassislar tomonidan arxeologik tadqiqotlar davom ettirilmoqda.
