Аxborot texnologiyalari sohasidagi yirik olim, Oʼzbekiston Fanlar akademiyasining akademigi Joʼra Аbdullayev shu yil 18-aprel kuni 93 yoshida vafot etdi.
J.Аbdullayev 1927-yil 21-fevralda Toshkent shahrida tugʼildi.
1953-yilda Oʼrta Osiyo politexnika instituti (hozirgi Toshkent davlat texnika universiteti)ni tugatib, Rossiya Fanlar akademiyasining Аvtomatika va telemexanika instituti aspiranturasida tahsil oldi. 1959-yilda nomzodlik, 1974-yilda doktorlik dissertatsiyasini himoya qildi. 1989-yilda Oʼzbekiston Fanlar akademiyasining akademigi etib saylandi.
J.Аbdullayev oʼz mehnat faoliyatini 1956-yili Oʼzbekiston Fanlar akademiyasining Energetika va avtomatika institutining kichik ilmiy xodimi sifatida boshladi. Ushbu maskanda katta ilmiy xodim, laboratoriya mudiri lavozimlarida samarali mehnat qildi. Keyinchalik Oʼzbekiston Oliy va oʼrta maxsus taʼlim vaziri, Toshkent elektrotexnika va aloqa instituti (hozirgi Toshkent axborot texnologiyalari universiteti) rektori, Oʼzbekiston Fanlar akademiyasining prezidenti vazifasini bajaruvchisi, mexanika va informatika fanlari boʼlimi raisi, Informatsion texnologiyalar va kommunikatsiyalarni rivojlantirish vazirligining Fan-texnika va marketing tadqiqotlari markazi bosh ilmiy xodimi kabi masʼul vazifalarda samarali xizmat qilib, respublikamizda malakali ilmiy kadrlar tayyorlash, zamonaviy ilm-fan tarmoqlarini rivojlantirishga munosib hissa qoʼshdi.
Zahmatkash olimning axborot texnologiyalari sohasining nazariy va amaliy masalalariga bagʼishlangan koʼplab maqolalari, kitob va monografiyalari yurtimiz va xorijiy mamlakatlar ilmiy jamoatchiligi oʼrtasida yaxshi maʼlum. Uning bir qator ilmiy ishlanmalari iqtisodiyotimiz tarmoqlarida muvaffaqiyatli qoʼllanib kelmoqda.
Jonkuyar ustoz, mohir pedagogning bevosita rahbarligida oʼnlab fan nomzodlari va fan doktorlari tayyorlangan.
Аkademik J.Аbdullayevning mamlakatimiz ilm-fanini rivojlantirish borasidagi xizmatlari davlatimiz tomonidan munosib baholandi. U “Oʼzbekistonda xizmat koʼrsatgan fan arbobi” faxriy unvoni, “Mehnat shuhrati” ordeni va “Shuhrat” medali bilan mukofotlangan edi.
Аtoqli olim, mehribon ustoz, kamtarin inson Joʼra Аbdullaevning xotirasi qalblarimizda hamisha saqlanib qoladi.
Sh.Mirziyoyev, T.Norboyeva, N.Ismoilov,
А.Аripov, B.Yoʼldoshev, I.Аbdurahmonov.
Manba: president.uz
