Oʼzbekiston Respublikasi Fanlar akademiyasi Quyosh energiyasi xalqaro instituti olimlari tomonidan meteostansiya ishlab chiqildi.
Quyosh energiyasi xalqaro instituti binosiga oʼrnatilgan meteostantsiya bir vaqtning oʼzida Quyosh nurlanishi quvvatini, shamol tezligi va yoʼnalishini, atrof-muhit haroratini oʼlchash imkonini beradi. Meteostansiya Quyosh nurlanishi quvvatini oʼlchaydigan ikkita datchikdan, biri gorizontal ravishda, ikkinchisi, gorizontga 45о burchak ostida joylashtirilgan, shamol tezligi va yoʼnalishini oʼlchaydigan datchikdan hamda haroratni aniq oʼlchaydigan termometrdan tashkil topgan. Ushbu qurilmalardan olingan maʼlumotlar ikkilamchi qurilma orqali kompyuterga yuboriladi. Kompyuterda Institut olimlari tomonidan yaratilgan maxsus dastur oʼrnatilgan, har bir daqiqada (vaqt oraligʼini 60 daqiqagacha oʼzgartirish mumkin) oʼlchangan maʼlumotlar kompyuterda saqlanib boriladi. Meteostansiya tizimi elektr energiya taʼminoti yuqori samaradorlikka ega boʼlgan Quyosh fotoelektrik modullari tomonidan amalga oshiriladi. Respublika boʼylab bunday qurilmalarni yuzlab/minglab oʼrnatish koʼzda tutilmoqda va bu Oʼzbekistonda energetik bashoratlash (Energy metrology)ni rivojlantirish imkonini beradi. Natijada katta miqdorda qayta tiklanadigan energiya manbalari ulangan elektr tarmoqlariga ega energetika tizimini turgʼunligini saqlashda muhim boʼlgan naukasting bashoratlash (nowcasting) tizimi yaratiladi.
