Fanlar akademiyasida Vazirlar Mahkamasi, tegishli tizim tashkilotlari va mas'ullari ishtirokida o'tkazilgan iqtisodiy o'qishda FA Ilmiy kadrlar bo'limining 2019-2023 va 2024-yillar holati boʼyicha ilmiy kadrlarni tayyorlash tizimi va uni takomillashtirish masalalari tahlil qilindi.
Fanlar akademiyasi tizimida jami 5343 nafar xodim (oʼrtacha yoshi — 46), shu jumladan 2834 nafar ilmiy xodim (oʼrtacha yoshi — 47,3), ulardan 494 nafar fan doktorlari (DSc) (oʼrtacha yoshi — 56), 334 nafar fan nomzodi (oʼrtacha yoshi — 57,3) va 511 nafar falsafa doktori (PhD) va (oʼrtacha yoshi-38) faoliyat yuritmoqda.
2025 -yil holati boʼyicha Fanlar akademiyasi tizimida 32 ta tashkilotda oliy taʼlimdan keyingi taʼlim institutlari tashkil etilgan. Bugungi kunda mazkur tashkilotlarda jami 916 nafar, jumladan, 82 ta doktorant, 746 nafar tayanch doktorant, 88 nafar stajyor-tadqiqotchi va 130 nafar mustaqil izlanuvchilar tahsil olmoqda.
Bugungi kunda oliy taʼlimdan keyingi taʼlim jarayoni quyidagi normativ-huquqiy hujjatlar asosida olib boriladi:
1. Oʼzbekiston Respublikasi Prezidentining 2017-yil 16-fevraldagi PF-4958-sonli "Oliy oʼquv yurtidan keyingi taʼlim tizimini yanada takomillashtirish toʼgʼrisida"gi Farmoni;
2. Oʼzbekiston Respublikasi Vazirlar Mahkamasining 2017-yil 22-maydagi 304-son "Oliy taʼlimdan keyingi taʼlim tizmini yanada takomillashtirish toʼgʼrisida"gi qarori;
3. Oʼzbekiston Respublikasi Vazirlar Mahkamasining 2020-yil 06-noyabrdagi 696-sonli “Ilmiy darajali kadrlarni tayyorlash jarayonlarining shaffofligini taʼminlash va samaradorligini oshirish chora-tadbirlari toʼgʼrisida” qarori.
Iqtisodiy oʼqish davomida Kadrlar boʼlimi rahbari Dilorom Toʼrayeva tomonidan Fanlar akademiyasi tizimidagi doktorantura, tayanch doktorantura va stajyor-tadqiqotchilar institutining 2019-2024-yillardagi samaradorligi toʼgʼrisida tahliliy maʼlumotlar berildi.
