Joriy yil 20 fevral kuni OʼzR FА Oʼzbekiston tarixi davlat muzeyida OʼzR FА Milliy arxeologiya markazi hamda Аndijon viloyati tarixi va madaniyati davlat muzeyi hamkorligidagi dala tadqiqotlari natijalariga bagʼishlangan “Qoʼshtepa-2 tadqiqotlari rakursida qadim Farg’ona madaniyatlari” nomli koʼchma koʼrgazmasi ochildi.
Ushbu koʼrgazmadan Fargʼona vodiysining bronza davridan oʼrta asrlargacha boʼlgan tarixi haqida hikoya qiluvchi topilmalar joy olgan.
Olib borilgan tadqiqotlar natijasida Qoʼshtepa yodgorligi oʼz qarida 12 asrdan koʼproq uzluksiz hayot izlarini saqlab kelayotganligi aniqlandi, yaʼni, mil.av. IV-III asrdan VIII asrgacha va qisman X-XII asrlarda ajdodlarimizning tadrijiy tarixi aks etib, 6 dan ziyod qurilish davrlarini bosib oʼtgan.
Yodgorlkning turli qatlamlarida qadimgi tosh va bronza davrlariga oid topilmalarning aniqlanishi, yaqin atrofda naleolit va Chust madaniyatiga tegishli manzilgohlarning mavjudligi yoki Qoʼshtepa tosh va bronza davrlariga oid manzilgohlarning ustida qad koʼtarilganligidan dalolat beradi.
