Yagona aloqa raqami
  (+998) 71 2000036
;    
Ishonch telefoni
  (+998) 71 2335623

Fanlar akademiyasi Yadro fizikasi hamda Ion-plazma va lazer texnologiyalari institutlariga fizika fanlari boʼyicha falsafa doktori (PhD) va fan doktori (Dsc) ilmiy darajalarini berish vakolati taqdim etildi


Oʼzbekiston Respublikasi Prezidentining “Fizika sohasidagi taʼlim sifatini oshirish va ilmiy tadqiqotlarni rivojlantirish chora-tadbirlari toʼgʼrisida”gi PQ–5032-son (19.03.2021-y.) qarori qabul qilindi.

Qaror bilan 2021–2023 yillarda fizika fanlari boʼyicha taʼlim sifatini oshirish va fizika sohasidagi ilmiy tadqiqotlarning natijadorligini taʼminlash boʼyicha Kompleks chora-tadbirlar dasturi tasdiqlandi.

Qarorga koʼra, Oʼzbekiston Milliy universiteti, Samarqand davlat universiteti, Fanlar akademiyasi Yadro fizikasi instituti va Ion-plazma va lazer texnologiyalari institutiga fizika fanlari boʼyicha falsafa doktori (PhD) va fan doktori (Dsc) ilmiy darajalarini berish vakolati taqdim etildi.

Shuningdek, Fanlar akademiyasi Fizika-texnika instituti tuzilmasida elektrotexnika sohasida xorijiy mamlakatlarning ilgʼor texnologiyalarini oʼrganish va mahsulotlarni ishlab chiqarishni mahalliylashtirish boʼyicha byudjetdan tashqari mablagʼlar hisobidan saqlanadigan tajriba ishlab chiqarish va konstruktorlik byurosi hamda Fanlar akademiyasi tizimiga kiruvchi fizika yoʼnalishidagi ilmiy tashkilotlarda ularning byudjetdan tashqari mablagʼlari hisobidan moliyalashtiriladigan marketing va tijoratlashtirish boʼlimlari tashkil etiladi.

Bundan tashqari, Qarorga koʼra, 2021-yil 1-sentyabrdan:

- Oliy taʼlim muassasalarining “Fizika”, “Fizika va astronomiya”, “Biotibbiyot fizikasi” kabi bakalavriat taʼlim yoʼnalishi talabalari oʼrtasida oʼtkaziladigan respublika fan olimpiadasi gʼoliblari va fizika boʼyicha nufuzli xalqaro olimpiadalar sovrindorlari fizika mutaxassisliklari boʼyicha qabul parametrlaridan tashqari davlat granti asosida magistraturaga oʼqishga qabul qilinadi;

- fizika fanlari boʼyicha xalqaro va respublika olimpiadalari gʼoliblarini tayyorlagan professor-oʼqituvchilarga oylik maoshining 100 foizi miqdorida bir martalik pul mukofoti;

- fizika fanlari boʼyicha talabalar uchun toʼgaraklar olib borayotgan professor-oʼqituvchilarning oylik maoshlariga 25 foiz miqdorida har oy ustama haq toʼlanadi.

Shuningdek, 2022–2024 yillarda jami 21 ta oliy taʼlim muassasalarining fizika fani boʼyicha oʼquv laboratoriyalari zamonaviy jihozlar bilan taʼminlanadi.

2021/2022 oʼquv yilidan oliy taʼlim tizimida fizika fanlari sohalarga moslashtirilgan holda oʼqitiladi.

 2021-yil 1-noyabrgacha yoshlar oʼrtasida fizika fanlariga qiziqishni oshirish maqsadida “Yosh fiziklar portali” ishga tushiriladi.


Yangiliklarni telegram kanalimizda kuzatib boring!