Milliy yadro tadqiqotlar universitetining Moskva muhandislik-fizika instituti Toshkent filiali talabalarini Oʼzbekiston Respublikasi Fanlar akademiyasi Yadro fizikasi instituti faoliyati va u yerda olib borilayotgan ilmiy izlanishlar bilan yaqindan tanishtirib borish Filial taʼlim dasturining ajralmas qismi hisoblanadi. Bu dastur talabalarda ilmiy ish olib borish koʼnikmalarini shakllantirishga va ilm-fanga qiziqtirishga qaratilgan. Unga koʼra, FА Yadro fizikasi institutining yetakchi olimlari bilan muntazam ravishda uchrashuvlar oʼtkazib borish koʼzda tutilgan.
Filialda mazkur dastur doirasida OʼzR FА prezidenti, akademik B.S.Yuldashev bilan uchrashuv tashkil etildi.
Uchrashuvda akademik B.S.Yuldashev oʼz maʼruzasini olamning paydo boʼlishi va materiyaning rivojlanish qonuniyatlariga bagʼishladi hamda katta portlash sodir boʼlgan ondan to hozirgi zamon sivilizatsiya davrigacha boʼlgan oraliq tarixini batafsil va ilmiy asoslangan faktlar bilan gapirib berdi. Аkademik B.S.Yuldashev yadro energetikasi va boshqa hozirgi zamon ilm-fani hamda texnikasining muhim muammolariga qaratilgan bu kabi uchrashuvlar muntazam tashkil etib borilishini, ularda dolzarb muammolar yechimi va ularning istiqboli muhokama qilinishini taʼkidladi.
Talabalar qizgʼin savol va javoblarga boy boʼlgan uchrashuvda Yadro fizikasi institutida olinayotgan radioizotoplar, ularning xalq xoʼjaligida ishlatilishi, ajratib olish usullari, yangi izotoplarni olishda yadroviy tahlil va radiatsion kimyo usullarining mohiyati toʼgʼrisida toʼliq maʼlumotlarga ega boʼlishdi.
Bu kabi uchrashuvlar talabalar bilimlarini yanada boyitishda va ularni ilm-fanga qiziqishlarini oshirishda muhim rol oʼynaydi.
Talabalarning yetakchi olimlar bilan uchrashuvlari bundan keyin ham davom etadi.
