2021-yil 16-18-mart kunlari OʼzR FА Аstronomiya instituti tomonidan “Mirzo Ulugʼbek ilmiy merosining zamonaviy astronomiya fani va taʼlimi ravnaqidagi roli” mavzusida respublikamiz oliy oʼquv yurtlaridagi astronomiya yoʼnalishida tahsil olayotgan talabalar uchun seminar-trening oʼtkazildi.
Bu kabi seminarlar FА Аstronomiya instituti tomonidan muntazam oʼtkazilishi anʼanaga aylanib qolgan. Navbatdagi seminar mavjud pandemik vaziyatni hisobga olgan holda onlayn tarzda oʼtkazildi. Seminar-treningda Oʼzbekiston Milliy universiteti, Nizomiy nomidagi Toshkent davlat pedagogika universiteti, Аndijon, Fargʼona, Qarshi, Samarqand hamda Termiz davlat universitetlari, Nukus, Qoʼqon, Jizzax, Chirchiq davlat pedagogika institutlaridan 200 ga yaqin iqtidorli talaba va magistrlar ishtirok etdilar.
Seminar-treningni Institut direktori, akademik Sh.А. Egamberdiev ochib, talabalarni qutladi va seminar ishida muvaffaqiyatlar tiladi. Dastlab, qatnashchilarga “Mirzo Ulugʼbek vorislari” filmi namoyish etildi. Shundan soʼng maʼruzalarga oʼtildi.
Seminar-trening davomida FА Аstronomiya institutining yetakchi mutaxassis olimlari va yosh tadqiqotchilari talabalarga astronomiya, nazariy va amaliy astrofizika boʼyicha maʼruzalar oʼqidilar. Jumladan, “Oy taqvimi”, “Maydanak observatoriyasi”, “Ekzosayyoralar”, “Oʼta yangi yulduzlar”, “Qora oʼralar”, “Qorongʼi modda va qorongʼi energiya” kabi bir qator qiziqarli maʼruzalar talabalar eʼtiboriga havola etildi hamda ularni astronomiya fani sohasidagi oxirgi yangiliklar bilan tanishtirdilar. Bundan tashqari, Institutning yosh olimlari tomonidan Quyosh dogʼlarini kuzatish boʼyicha onlayn tarzda amaliy mashgʼulotlar oʼtkazildi. Ishtirokchilar Аstronomiya institutida, Maydanak observatoriyasida hamda Mirzo Ulugʼbek maktabida oʼrnatilgan teleskoplar haqida maʼlumotlar bilan tanishtirildi, bunda, ayniqsa, Maydanak observatoriyasidan toʼgʼridan-toʼgʼri translyatsiya jarayoni ishtirokchilarda katta qiziqish uygʼotdi va ularda katta taassurot qoldirdi.
Shuningdek, ishtirokchilar oʼzlarini qiziqtirgan savollarga FА Аstronomiya institutining yetakchi mutaxassis olimlari va yosh tadqiqotchilaridan javoblar olishdi.
