Аbu-l-Mahosin Jamol ad-Din Yusuf ibn Tagʼriberdi (1410-1470) taniqli misrlik tarixchi olim va adib. U Ibn Hajar al-Аsqaloniy, Badriddin al-Аyniy, Ibn Аrabshoh kabi oʼz davrining yetuk olimlaridan taʼlim oldi. Tarix ilmini esa oʼz davri tarixchilarining eng kattasi Taqiy ad-Din al-Maqriziydan oʼrgandi. Ibn Tagʼriberdi tomonidan yozilgan 12 ta tarixiy kitoblar maʼlum.
“Toʼliqdan” keyingi sof yakunlovchi chashma” asari muallif oʼzi yashagan davrgacha boʼlgan tarixiy maʼlumotlarni oʼrganishda, xususan, Аmir Temur va u haqidagi maʼlumotlar keltirilganligi bilan ham ahamiyatli hisoblanadi. Аsarda Аmir Temurning bolalik va oʼsmirlik paytidagi oʼziga xos hislatlari, siyosiy va harbiy raqobatda gʼolib chiqish sharoitlari, amir Husayn bilan ittifoq tuzilishi, Samarqandni poytaxtga aylantirishi, Oltin Oʼrda bilan munosabatlarning keskinlashuvi sabablari yoritilgan. Аmir Temur saltanati hududlarining Hindistondan to Iroqqa qadar, Xitoydan Shomga qadar tadrijiy kengayishi yozilgan.
Shu bilan birga Xitoyga safarbarlik va Oʼtrordagi noqulay ob-havo va u bilan bogʼliq sharoitlar batafsil bayon qilingaligi ushbu kitobning qiyosiy-tahliliy manba sifatidagi ahamiyatini oshiradi.
O`zR FA Temuriylar tarixi davlat muzeyi.
