Bugun, 16-fevral kuni OʼzR FА Fizika-texnika institutida Аlisher Navoiy va Zahiriddin Muhammad Bobur tavalludiga bagʼishlangan maʼrifiy tadbir tashkil etildi.
Tadbirda Institut jamoasi, el ardogʼidagi sanʼatkor, Oʼzbekiston xalq artisti Tesha Moʼminov, taniqli maʼnaviyat targʼibotchisi, psixolog Dilorom Isakova ishtirok etdilar.
Tadbirni Fizika-texnika instituti direktori Xusniddin Olimov ochib berdi. Soʼngra el ardogʼidagi sanʼatkor Tesha Moʼminov buyuk shoir va mutafakkir, atoqli davlat va jamoat arbobi Alisher Navoiyning bebaho ijodiy-ilmiy merosi nafaqat xalqimiz, balki jahon adabiyoti tarixida alohida oʼrin tutishiga batafsil toʼxtalib oʼtdi. Alisher Navoiyning boy va serqirra ijodiy merosini har tomonlama chuqur oʼrganishimiz zarurligi haqida oʼz fikrlari bilan oʼrtoqlashdilar. Buyuk bobokalonimizning naslu nasabi, tugʼilgan kunidan to umri poyonigacha qilgan betimsol ishlari haqida biz asosan tarixiy, adabiy-badiiy asarlar orqali yaxshi bilamiz. Hazrat Mir Аlisher Navoiyning koʼplab sheʼrlari, asarlaridan oʼqib berdilar:
Temurxon naslidin sulton Ulugʼbek,
Ki olam koʼrmadi sulton aningdek.
Аning abnoyi jinsi boʼldi barbod,
Ki davr ahli biridin aylamas yod.
Shuningdek, Oʼzbekiston xalq artisti Tesha Muminov Zahiriddin Muhammad Bobur ijodi haqida bayon qildilar. Jumladan “Hindistonning kashf etilishi” kitobida Javoharlal Neruning Bobur haqidagi quyidagi soʼzlarini keltirdilar: “Bobur dilbar shaxs edi. Uygʼonish davrining ajoyib sultoni, kuchli, tadbirkor kishi boʼlib, sanʼatni, adabiyotni, goʼzallikni sevardi”.
Koʼplab badiiy filmlarda oʼynagan, teatr sahnalarida unitilmas obrazlar yaratgan, xalq ardogʼiga tushgan buyuk sanʼatkor Tesha Muminovning chiqishi Institut xodimlarida katta taassurot qoldirdi.
So’ngra taniqli maʼnaviyat targʼibotchisi, psixolog Dilorom Isakova bu kabi tadbirlar nechogʼli hayotimizda tarbiyaviy ahamiyatga ega ekanligi haqida maʼruza qildilar, yaxshilika intilish, muhabbat haqidagi oʼz fikrlari bilan oʼrtoqlashdi.
Qiziqarli oʼtgan uchrashuv yakunida psixolog olim tomonidan Institut xodimlari oʼrtasida psixologik test - trening oʼtkazildi.
Tadbir judayam qiziqarli, mazmunli, bahs munozaraga boy boʼldi.
Uchrashuvni yakunlar ekan, Institut direktori X.K. Olimov bugungi tadbirga tashrif buyurgan mehmonlar ijodiga ulkan muvaffaqiyatlar tiladi. Ularga samimiy minnatdorchilik bildirdi.
