Yagona aloqa raqami
  (+998) 71 2000036
;    
Ishonch telefoni
  (+998) 71 2335623

Manbashunos, muzeyshunos olim Nozim Habibullayev vafot etdi


Habibullayev Nozim Nasibullayevich – manbashunos, muzeyshunos olim, tarix fanlari nomzodi, dotsent.

U 1951-yil 7-iyunda Toshkentda tugʼilgan. 1968-1973-yillarda Toshkent davlat universiteti sharq fakulьtetining arab boʼlimida taʼlim oldi. Universitetni tugallagach bir yil davomida Oʼzbekiston Telegraf Аgentligida muxbir boʼlib ishladi. 1974-yilda OʼzR FА Tarix institutining qadimgi va oʼrta asr tarixi boʼlimiga kichik ilmiy xodim boʼlib ishga oʼtdi. 1988-yilda Institutning ilmiy kengashida “Бумажное производство в Средней Азии” mavzusida nomzodlik dissertatsiyasini himoya qildi. 1989-yilda Tarix institutining qadimgi va oʼrta asr tarixi boʼlimiga mudir etib tayinlandi. 1996-2014-yillarda OʼzR FА Temuriylar tarixi davlat muzeyi direktori lavozimida 18 yil davomida faoliyat olib bordi. U bevosita muzey tashkil etilishining asoschilaridan biri boʼlib, Muzey fondining boyishida, yangi koʼrgazmalar, ilmiy loyihalar, mahalliy va xalqaro miqiyosda tashkil etilgan konferensiyalarning tashkilotchisi sifatida muhim ishlarni amalga oshirdi. Xususan, uning rahbarligida ilk bora xorijning 13 dan ortiq yirik muzeylari hamda 10 dan ortiq shaxsiy kolleksiyalarida saqlanayotgan Temuriylarga oid ashyolar tadqiq etilib, ular asosida yangi koʼrgazmalar tashkil qilindi va Muzey fondi yangi eksponatlar, fotosuratlar bilan boyidi. Shu bilan birga N.N.Habibullayev Temuriylar davri sanʼati va madaniyatini targʼib etishga doir xalqaro anjumanlarning Muzeyda ilk bor tashkil etilishida ilmiy koordinator sifatida ham faoliyat olib bordi.

Olim oʼz faoliyatida qator xorijiy davlatlarda ilmiy safarlarda boʼlib, xalqaro konferensiyalar va simpoziumlarda oʼz maʼruzalari bilan ishtirok etdi. Shu bilan birga olim Koreya, Yaponiya, Xitoy olimlari bilan hamkorlikda ishlanayotgan, Samarqand qogʼozini yaratish va uni targʼib etishga bagʼishlangan xalqaro loyihada ham ishtirok etdi.

2019-yilda N.Habibullayev masʼulligida “Oʼzbekiston tarixi xrestomatiyasi”ning IV jildi qayta nashrga tayyorlandi.

Oʼzbekiston madaniyati tarixini asrash, tadqiq va targʼib etish bilan bogʼliq masalalar bevosita uning rahbarligida olib borilgan qator fundamental loyihalarda, koʼrgazmalarda va 100 dan ortiq ilmiy nashrlarda oʼz ifodasini topdi. U 100 ga yaqin ilmiy va 100 dan ziyod ilmiy-ommabop maqolalar, 3 ta monografiya muallifidir. Uning rahbarligida 1 ta fan doktori va 3 fan nomzodi tayyorlangan.

Isteʼdodli olim, ilgʼor tashkilotchilik va yuksak insoniy fazilatlari bilan respublika hamda xorijiy olimlar hurmatini qozondi.

Uning xizmatlari davlatimiz tomnidan ham yuksak baholanib, “Shuhrat” medali (1996-y.), “Mehnat shuhrati” ordeni (2001-y.), “Oʼzbekiston Respublikasi Mustaqilligiga 25 yil” esdalik koʼkrak nishoni (2016-y.) bilan taqdirlangan.

OʼzR Fanlar akademiyasi jamoasi Temuriylar tarixi davlat muzeyi katta ilmiy xodimi, tarix fanlari nomzodi, dotsent Habibullayev Nozim Nasibullayevichning bevaqt vafoti munosabati bilan uning oila aʼzolariga chuqur taʼziyasini izhor etadi.


Yangiliklarni telegram kanalimizda kuzatib boring!